टेकामांडवा पोलीस ठाणे हद्दीत अवैध दारू विक्रीचा सुळसुळाट? स्थानिकांचा संताप; वरिष्ठांनी तातडीने चौकशी करावी, कारवाईची मागणी*

चंद्रपूर जिल्हा प्रतिनिधी हाकानी शेख 

*टेकामांडवा पोलीस ठाणे हद्दीत अवैध दारू विक्रीचा सुळसुळाट? स्थानिकांचा संताप; वरिष्ठांनी तातडीने चौकशी करावी, कारवाईची मागणी*

हकानी शेख चंद्रपूर जिल्हा प्रतिनिधी 

जिवती:- टेकामांडवा पोलीस ठाण्याच्या हद्दीतील टेकामांडवा, पाटागुडा, हिमायतनगर आणि मराई पाटण या गावांमध्ये देशी-विदेशी अवैध दारूची विक्री मोठ्या प्रमाणात सुरू असल्याची तक्रार स्थानिक नागरिक आणि महिला वर्गाकडून केली जात आहे. या प्रकारामुळे अनेक कुटुंबांचे संसार उद्ध्वस्त होत असून गावागावात तंटे, भांडणे आणि सामाजिक अस्थिरता वाढत असल्याचा आरोप नागरिकांनी केला आहे.

स्थानिकांच्या म्हणण्यानुसार, अवैध दारू सहज उपलब्ध होत असल्याने अल्पवयीन युवकांमध्येही व्यसनाचे प्रमाण वाढत आहे. त्यामुळे शिक्षण, आरोग्य आणि सामाजिक वातावरणावर गंभीर परिणाम होत असून अनेक कुटुंबे आर्थिक व मानसिक संकटात सापडल्याचे सांगितले जात आहे.

महिला वर्गामध्येही या अवैध दारू विक्रीबाबत तीव्र नाराजी असून, गावातील दारू विक्री तात्काळ बंद करण्याची मागणी जोर धरत आहे. "अवैध दारूच्या विळख्यातून गावांची मुक्तता करा," अशी भावना अनेक महिलांनी व्यक्त केल्याचे सांगितले जात आहे.

दरम्यान, स्थानिकांमध्ये अशीही चर्चा असल्याचा दावा केला जात आहे की, संबंधित यंत्रणेला या प्रकाराची माहिती असूनही प्रभावी कारवाई होत नाही. मात्र, या दाव्यांची अधिकृत पुष्टी झालेली नाही. त्यामुळे या प्रकरणाची निष्पक्ष चौकशी करून सत्य समोर आणण्याची मागणी होत आहे.

नागरिकांचे म्हणणे आहे की, जर अवैध दारू विक्रीवर तातडीने कठोर कारवाई झाली नाही, तर गुन्हेगारी, व्यसनाधीनता आणि कौटुंबिक हिंसाचाराचे प्रमाण आणखी वाढू शकते. त्यामुळे वरिष्ठ पोलीस अधिकाऱ्यांनी स्वतः लक्ष घालून संबंधित गावांमध्ये विशेष तपास मोहीम राबवावी, दोषींवर कठोर कारवाई करावी आणि अवैध दारू विक्री कायमची बंद करावी, अशी जोरदार मागणी सामान्य नागरिक व महिला वर्गातून होत आहे.

आता या प्रकरणात वरिष्ठ पोलीस अधिकारी काय भूमिका घेतात आणि नागरिकांच्या तक्रारींची दखल घेऊन कोणती ठोस कारवाई करतात, याकडे संपूर्ण परिसराचे लक्ष लागले आहे.