प्राथमिक आरोग्य केंद्र पाटणमध्ये अस्वच्छतेचा विळखा; रुग्णांच्या आरोग्याशी खेळ सुरू असल्याची नागरिकांत चिंतारुग्णांच्या बेडवर बेडशीटचा अभाव;कर्मचारी निवास परिसरात गवत-झुडपांचे साम्राज्य, इमारतीला भेगा पडल्याने सुरक्षेचा प्रश्न ऐरणीवर:

चंद्रपूर जिल्हा प्रतिनिधी हाकानी शेख 

प्राथमिक आरोग्य केंद्र पाटणमध्ये अस्वच्छतेचा विळखा; रुग्णांच्या आरोग्याशी खेळ सुरू असल्याची नागरिकांत चिंता

रुग्णांच्या बेडवर बेडशीटचा अभाव;

कर्मचारी निवास परिसरात गवत-झुडपांचे साम्राज्य, इमारतीला भेगा पडल्याने सुरक्षेचा प्रश्न ऐरणीवर:

हकानी शेख चंद्रपूर जिल्हा प्रतिनिधी

जिवती:- जिवती तालुक्यातील पाटण येथील प्राथमिक आरोग्य केंद्राच्या परिसरात अस्वच्छता आणि देखभालीअभावी आरोग्य सुविधांच्या दर्जाबाबत प्रश्नचिन्ह निर्माण झाले आहे. रुग्णालयातील रुग्णांच्या बेडवर आवश्यक बेडशीट उपलब्ध नसल्याची तक्रार असून, परिसरात ठिकठिकाणी घाण-कचरा साचलेला असल्याने रुग्ण व त्यांच्या नातेवाईकांना गैरसोयीचा सामना करावा लागत असल्याचे सांगण्यात येत आहे.

प्राथमिक आरोग्य केंद्रातील कर्मचारी ज्या शासकीय निवासस्थानांच्या (क्वार्टर्स) परिसरात राहतात, त्या ठिकाणीही मोठ्या प्रमाणात गवत व झुडपे वाढल्याचे दिसून येत असल्याची तक्रार आहे. काही ठिकाणी क्वार्टर्सच्या स्लॅबवरही गवत वाढल्याचे निदर्शनास येत आहे. सध्या पावसाळ्याचे दिवस असल्याने अशा ठिकाणी विषारी साप, विंचू तसेच इतर जीवजंतूंचा वावर वाढण्याची शक्यता असल्याने कर्मचारी आणि त्यांच्या कुटुंबीयांच्या सुरक्षिततेचा प्रश्न निर्माण झाला आहे.

याशिवाय प्राथमिक आरोग्य केंद्राची तसेच कर्मचारी निवासस्थानांची इमारतही दुरवस्थेत असल्याची तक्रार करण्यात आली आहे. काँक्रीटच्या बांधकामाला काही ठिकाणी भेगा पडलेल्या असून, जागोजागी बांधकामाची झीज झाल्याचे दिसून येत असल्याने संबंधित इमारतींची तांत्रिक पाहणी करून आवश्यक दुरुस्ती करणे गरजेचे असल्याचे नागरिकांचे म्हणणे आहे.

आरोग्य केंद्रात उपचारासाठी येणाऱ्या रुग्णांना स्वच्छ, सुरक्षित आणि सन्मानजनक वातावरण मिळणे ही मूलभूत बाब आहे. सार्वजनिक आरोग्य संस्थांच्या परिसरात स्वच्छता, कचरा व्यवस्थापन, सुरक्षितता आणि इमारतींची नियमित देखभाल याकडे संबंधित यंत्रणेने गांभीर्याने लक्ष देणे आवश्यक आहे.

या संपूर्ण परिस्थितीबाबत राष्ट्रवादी काँग्रेस पार्टीच्या अल्पसंख्याक विभागाचे जिवती तालुकाध्यक्ष आरिफ शेख डोंगरे यांनी प्रशासनाचे लक्ष वेधले आहे. प्राथमिक आरोग्य केंद्राच्या परिसरात तातडीने साफसफाई करून नियमित स्वच्छता राखावी, रुग्णांच्या बेडवर आवश्यक बेडशीटची व्यवस्था करावी तसेच कर्मचारी क्वार्टर्स आणि प्राथमिक आरोग्य केंद्राच्या इमारतीची तांत्रिक तपासणी करून आवश्यक दुरुस्ती करण्यात यावी, अशी मागणी त्यांनी केली आहे.

पावसाळ्यात साप-विंचू किंवा इतर जीवजंतूंचा धोका निर्माण होण्यापूर्वी परिसरातील गवत व झुडपे हटवून स्वच्छता मोहीम राबविण्याची मागणीही करण्यात आली आहे. प्रशासनाने या तक्रारींची प्रत्यक्ष पाहणी करून वस्तुस्थिती तपासावी आणि आवश्यक त्या उपाययोजना तातडीने कराव्यात, अशी अपेक्षा नागरिकांकडून व्यक्त होत आहे.

आरोग्य केंद्रच अस्वच्छतेच्या विळख्यात असेल, तर नागरिकांच्या आरोग्याची काळजी कोण घेणार? असा सवाल उपस्थित करत पाटण प्राथमिक आरोग्य केंद्राच्या स्वच्छता व इमारत दुरुस्तीचा प्रश्न तातडीने मार्गी लावण्याची मागणी जोर धरत आहे.