जिवती वनपरिक्षेत्रात 'वड महोत्सवा'चा दिमाखात शुभारंभ; # माणिकगड किल्ला परिसरात वृक्षारोपण

चंद्रपूर जिल्हा प्रतिनिधी हाकानी शेख 

जिवती वनपरिक्षेत्रात 'वड महोत्सवा'चा दिमाखात शुभारंभ; 

  # माणिकगड किल्ला परिसरात वृक्षारोपण

  पर्यावरणाचे रक्षण आणि संवर्धन करण्याच्या उद्देशाने जिवती वनपरिक्षेत्रात आजपासून (२९ जून) **'वड महोत्सवा'**ला मोठ्या उत्साहात सुरुवात झाली आहे. २९ जून २०२६ ते ५ जुलै २०२६ या सप्ताहादरम्यान चालणाऱ्या या महोत्सवाचा शुभारंभ ऐतिहासिक माणिकगड किल्ला परिसरातील दुर्गा माता मंदिर आणि राणी तलाव परिसरात वृक्षारोपण करून करण्यात आला.

यावेळी वनविभागाच्या अधिकारी व कर्मचाऱ्यांनी वडाची आणि इतर विविध प्रकारची रोपे लावून निसर्ग संवर्धनाचा संदेश दिला. वाढते तापमान आणि पर्यावरणाचा ढासळता समतोल पाहता, वडासारख्या दीर्घायुषी आणि प्राणवायू देणाऱ्या वृक्षांचे लागवड व जतन करणे काळाची गरज बनली आहे, हाच उद्देश या महोत्सवामागे आहे.

     या वृक्षारोपण कार्यक्रमाला वनविभागाच्या अधिकाऱ्यांनी आणि कर्मचाऱ्यांनी मोठ्या संख्येने उपस्थिती लावली. यामध्ये प्रामुख्याने वनपरिक्षेत्र अधिकारी 

आम्रपाली खोब्रागडे, क्षेत्र सहायक अरुण गेडाम ,क्षेत्र सहायक संजय सलामे ,क्षेत्र सहायक अर्चना पुणेकर ,क्षेत्र सहायक नरेश चापले उपस्थितीत होते तसेच, या मोहिमेला यशस्वी करण्यासाठी जिवती वनपरिक्षेत्रातील सर्व वनरक्षक आणि वनमजूर,संयुक्त वन व्यवस्थापन समितीचे सदस्य यांनी हिरीरीने सहभाग नोंदवत श्रमदान केले.

पुढील सात दिवस चालणाऱ्या या महोत्सवांतर्गत वनपरिक्षेत्रात विविध ठिकाणी वृक्षारोपण आणि जनजागृतीचे कार्यक्रम राबवले जाणार आहेत. वनविभागाच्या या स्तुत्य उपक्रमाचे निसर्गप्रेमी आणि नागरिकांकडून मोठे कौतुक होत आहे.